معتز التوني يغير خريطة الكوميديا بمصر

 كانت البدايه مع فيلم لو كان خيش كنا هنخسر كوميديا كتير لسنين قدام “سمير و شهير و بهير”
٣ مجانين كوميديا عملو فيلم كوميدي فانتازي و كان كلمة السر هو “معتز التوني”
قدر يخلق كيميا هايله بين شيكو و هشام و فهمي بسهوله و بدون مجهود و عايشه معانا لغايه دلوقتي ، التوني عنده ميزه انه بيقدر يطلع التلقائيه من الممثل اللي قدامه ببساطه كأنه مش قدام الكاميرا

و عايز اقولك برضه ان معتز التوني شارب المهنه صح لانه اشتغل مساعد مخرج في أعمال مهمه جدا زي ( افريكانو و تيتو و مافيا و شبه منحرف ”
لغايه ما بقي” صنايعي” كوميديا بيعرف يفجر الضحك من الموقف
اعتماد اسلوب اخراجه علي البساطه ، مش بيتفزلك كتير
عارف يقطع امتي عشان يخلق ضحك و امتي يدي مساحه للمثل و برضه يطلع ضحك منه
كادر نضيف مريح للعين يخدم الضحك و الحاله العامه للموقف
يعني من الاخر مش بيخلي اي حاجه تيجي علي حساب”الافيه”

معروف في الوسط الفني إن لوكيشن معتز التوني كله ضحك، والروح دي بتوصل للشاشة وبتحس إن الممثلين “مبسوطين” وهما بيمثلوا.

معتز التوني مخرج “متواضع” فنياً، بمعنى إنه مش عايز يبان “عبقري” أكتر ما عايز يبسط الناس. هو فاهم إن السينما والدراما في الأساس وسيلة ترفيه، وقدر يحقق المعادلة الصعبة: “نجاح جماهيري ساحق + احترام نقدي للعمل الكوميدي”.. ده غير أن أمنية أحلام ناس كتير انه يظهر علي الشاشة كتير ويكون ممثل حقيقي مش مجرد أدوار شرف بيطلعها في بعض الأعمال ده حتي أصحابه بيقعدو يسالوه في برنامجه “فضفضت أوي” مبتظهرش كتير كممثل ليه من كتر ماهو عنده قبول طاغي !

خد عندك بقي شغل زي اللعبه بجميع اجزائها و الكابتن و ربع رومي و هربانه منها و حاجات كتير، معتز التوني حقق فيها كوميديا كويسه