نقابة المهن التمثيلية تحيل فكرى صادق للتحقيق
كتبت /مروة علي حسين
نقابة المهن التمثيلية تحيل الفنان فكرى صادق للتحقيق بسبب
تصريحاته عن الفنان الراحل سعيد صالح.
وقد قال الفنان فكري صادق، حين سئُل عن دوره في فيلم «سلام ياصاحبي»، فقال إن الزعيم عادل إمام هو النجم بينما قال إن الفنان سعيد صالح ممثل عادي ويوجد ممثلون كثيرون مثله.
تعليقات المشاهدين على هذا الجزء من الحلقة بعد نشره على فيس بوك، كان الكثير منهم غاضبا من تصريحات فكري، ضد سعيد صالح.
ودافع مشاهدو البرنامج وصفحاته على السوشيال ميديا عن الراحل سعيد صالح بقوة، واعتبروه ضمن أهم النجوم
هند سعيد صالح، قالت عبر في تعليقها على حساب البرنامج الرسمي على فيس بوك: «والله العظيم كنت أتمنى بابا يكون عايش عشان يقرا الكومنتات الجميلة اللى من كمية الناس الجميلة دى ويعرف الناس بتحبه قد إيه».
وعادت هند سعيد صالح التعليق على الفيديو وقالت: «حد يبلغ أستاذ فكرى أن ذكر إسم سعيد صالح مدخل مشاهدات الفيديو على مليون مشاهدة دونا عن باقى ڤيديوهات الصفحة والبرنامج وأون تى ڤى كلها متشكرين يا جماعة على الواجب الجامد ده».وحرصت ابنة الراحل سعيد صالح الرد على ما قاله فكري صادق وكتبت عبر حسابها على فيسبوك تعليقا صادما وقالت: “إيه اللذاذة دى يا استاذ فكرى، انا مش هرد على حضرتك لأن اللهم لك الحمد الكومنتات قايمة بالواجب”.
وكتب مراد فكرى إبن الفنان فكرى صادق على صفحته الشخصيه فيس بوك أختى الغالية و الفنانة بنت الاصول هند سعيد صالح
طبعا إنتى تعلمى جيدآ عشقى و احترامى و تقديرى للنجم الكبير سعيد صالح و تاريخه منذ صغرى حتى تخرجنا أنا وانتى من سنين زملاء و إخوات من المعهد العالى للسينما
إحنا أكبر من إننا نتكلم على صفحات الفيس بوك يا بنت عمى و عمنا كلنا .و والدى بنفسه قال فى كذا لقاء قبل كده أن علاقته بالفنان سعيد صالح و عادل إمام كانت علاقة صداقة بعيد عن الفن و اشتغلوا سوا كتير و كل واحد مننا ممكن يقول كلمة عفوية دون قصد غلط …. و خصوصآ لما تتطلع الكلمة من جيل والدك و والدى لأن ده جيل عظيم و فاهم وواعى و خصوصآ إنهم جيل واحد كمان و الجيل ده معروف بالحب اصلأ لحد دلوقتى كمان
وإن كانت كلمه طلعت غلط او سؤ تفاهم حصل بشكل مفاجئ مش معناه إنه غلط لا سمح الله فى الأستاذ سعيد أو بيقول من شأنه رحمة الله عليه
و راعوا ياجماعة كبر السن و العفوية فى الكلام للناس الكبار … الناس دى فنانين كبار و أكبر من إننا نلوم عليهم أو نحاسبه بالكلمة … لأن سعيد صالح ده نجم كبير و فكرى صادق فنان كبير برضو .. و شكرآ المهتمين و عارفين ان ده مش طبع والدى وإن عمره فى الوسط الفنى ما حد زعل منه … الحمد لله إحنا ناس فى حالنا مش بتوع مشاكل ولا تريند علشان الناس تعرف مين فكرى صادق او نقيس بالتريند شعبية نجم كبير زى الاستاذ سعيد صالح ؟؟؟
و ربنا يرحم الجميع كل من عليها فان يا جماعة و كلمة( فنان عادى) كلمة لا تقليل شأن ولا سب و قذف لأى حد .. و أنا بيربطنى صداقة و زمالة مع أختى المونتيره المبدعة( هند سعيد صالح) من خلال المعهد العالى للسينما وأنا من عشاق النجم سعيد صالح و اشتغلت معاه مسلسل و كان إنسان جميل و دمه زى العسسسل و قعدنا اتكلمنا كتير عن ذكرياته هو و أبويا سوا كتير … و رغم ظروفه المرضية إلا إنه كان قيمة كبيرة جدا فى المكان و الناس الكبيرة بيبقى معاهم عذرهم أحيانا كثيرة .. طالما لا يوجد إهانة أو سب لا سمح الله .. يبقا الموضوع سؤ تفاهم و لازم توضيحه بشكل صحيح للناس فى أقرب وقت .. و لكل عشاق النجم سعيد صالح و أنا أولهم طبعآ
بس احتراما منكم و رجاء و ليس أمر من حضراتكم … بلاش نكبر المواضيع و نشمت فى بعض بالسرعة دى و نعلق لبعض المشانق علشان ممكن الحكاية تتفخم و يبقا موقف و يزعل ناس و إخوات و أصدقاء من بعض عشرتهم و صداقتهم قد عمر جيل كامل زى جيلنا الحالى … و ستستمر العلاقة الطيبة بين الأبناء لأخر العمر بأذن الله و لن تتغير أو تفسد بسبب كلمة أو وجهة نظر اتقالت على الهوا بشكل عفوي.. دون مونتاج أو تجميل للكلام من فنان له تاريخه و أعماله و عمره يتجاوز السبعين الحمد لله وهو والدى الفنان فكرى صادق
والله يا جماعة إللى حصل ده بيحصل فى معظم البرامج المسجلة و بيحصل أكتر من كده كمان و كلنا عارفين و فاهمين … و بيتم تظبيط الكلام كله فى المونتاج قبل عرض حلقة الضيف و أختى هند سعيد صالح تعلم هذا من خلال عملها مونتيرة لها بصمتها فى فن المونتاج لأكثر من برنامج لكن برنامج الأستاذة لميس الحديدى .. برنامج على الهواء مباشرة لو كانت حلقة متسجلة ماكانش حصل كل دة … الحمد لله و كامل اعتذارى بشكل أخوى لأختى الغالية هند سعيد صالح و للنجم الراحل سعيد صالح
و اتمنى يكون كلامى وضح حاجات كتيرة .للناس ..
