أكتر ممثل ماعندوش شخصية ولا مبدأ ممكن تشوفه في حياتك هو عمرو سعد ، عمرو سعد ده بدأ مع خالد يوسف في خيانة مشروعه وكان سنه صغير فإداله خالد يوسف بطولة فيلم مهم أوي اللي هو حين ميسرة والفيلم حقق نجاح كبير وبعدها إداله بطولة فيلم دكان شحاتة والفيلم كسر الدنيا وحقق نجاح كبير وهنا وصل بقا عمرو سعد لقمة غروره وعاش في دور الممثل المصري الأصيل اللي عاوز يعمل فيلم مصري ياخد الأوسكار وبيرفض أي دور يجيله في فيلم أجنبي وبيقول عن عمر الشريف إنه ممثل أمريكي وملوش علاقة بمصر ولا يمثلنا كمصريين وفاكر إنه عمر الشريف ده حد عادي كده زيه مثلاً وطول لقائاته في الفترة دي مكانش شايف حد قصاده لدرجة إن عادل إمام نفسه لما قابله بعدها قاله إقفل بقك وإحتفظ برأيك لنفسك وبطل عك ، المهم عمرو سعد من بعد فيلم دكان شحاتة وهو عمال يجرب في كل إتجاه ومش عارف يرسي علي بر في مرة عاوز يعمل فيلم مصري يوصل للعالمية فمش بقا يشوف قصة حلوة كده ومصرية ويعملها زي ما كوريا عملت فيلم كوري 100٪ إسمه parasite وخدت بيه الأوسكار لا ده بقا عمل فيلم أكشن هابط إسمه حملة فرعون وجاب معاه مايك تايسون والجبل وفاكر إن الفيلم هيدغدغ سينمات واشنطن والنتيجة طبعاً كان فشل الفيلم الذريع في مصر وخسارة المنتج فلوس كتير مرة تانية يعمل مسلسل شعبي إسمه شارع عبدالعزيز فينجح شوية ومرة يعمل مسلسل صعيدي إسمه يونس ولد فضة فينجح شوية ومرة يعمل مسلسل إثارة وتشويق إسمه وضع أمني فينجح شوية ومرة يعمل فيلم بلطجة أسمه ريجاتا فينجح شوية وكل النجاحات ده كلها نجاحات باهتة أوي وماتتقارنش بدكان شحاتة أو حين ميسرة كقيمة أو كمستوي وعلي فكرة أنا ما ذكرتش الحاجات اللي فشلت ومحدش شافها زي بركة وخرم إبرة وفيلم مولانا وفيلم الكبار وفيلم أسوار القمر وحتي فيلم كارما اللي تعاون فيه مع خالد يوسف وحرفياً يعني العشر سنين اللي بعد دكان شحاتة عمرو سعد معندوش حاجة واحدة قوية بجد في أي نوع يعني ما عملش مسلسل درامي قوي زي بدون ذكر اسماء أو هذا المساء مثلاً وماعملش مسلسل غموض وإثارة قوي وعلامة زي مسلسلات يوسف الشريف وماعملش مسلسل كوميدي قوي زي الكبير أوي مثلاً وحتي في السينما حاول في كل نوع وماعملش حاجة قوية وفي الفترة دي طبعاً نجمها الأول كان محمد رمضان اللي بيعمل مسلسلات شعبي بتكسر الدنيا وبتعمل أعلي نسبة مشاهدة فيقوم عمرو سعد يغير كل مبادئه اللي كان مزهقنا بيها بعد دكان شحاتة ويعمل مسلسلات شعبي هابطة لدرجة متدنية ولمدة ٣ سنين ورا بعض بنفس القصة ونفس الجسم ونفس قصة الشعر ومع ذلك برده ماقدرش يعمل علامة زي محمد رمضان ومؤخراً بعد نجاح جعفر العمدة قرر يعمل مسلسل علي نفس التيمة ويتعاون مع محمد سامي ويعمل سيد الناس وأنا متأكد إن المسلسل رغم مستواه المتدني هيحقق نجاح كبير أوي وفي السينما بيعمل عمرو سعد فيلم عالمي إسمه الغربان بميزانية 10 مليون دولار عشان يبقي فيلم مصري عالمي وأنا متأكد إن شاء الله إن الفيلم هيفشل وهيكون أوحش من حملة فرعون وهيخسر فلوس وأتمني من الأستاذ عمرو سعد إنه يلتفت لموهبته ويحاول يستغلها في أعمال كويسة ويبطل يناقض نفسه ويقلد محمد رمضان لإنه عمره ماهيبقي زيه وخصوصاً في المسلسلات أما عن السينما فعمرو سعد من بعد دكان شحاتة وهو ماقدمش عمل كويس رغم إجتهاده في إنه يعمل حاجات كويسة فأتمني إن السنين اللي جاية تكون أحسن من اللي فاتت لإنها مليانة عك
