هذا ما دونه الإعلامي والمحلل الكروى ، أحمد اسامه ،صباح الفل .. أنت جامد على مين ؟ عبر مقالة كتبها ونشرها علي صفحته الخاصة بموقع التواصل الإجتماعي فيس بوك والذى ود فيها علي أحم حسام ميدو لاعب الزمالك السابق ونجم منتخب مصر قائلا :
مبدئيًا جماهير الزمالك على مدار اسبوع تقريبا بتتغنى ب عفيفى ومتصوره إنه تغلب على كابتن سيد عبد الحفيظ ، عشان يجى ميدو يهد كل ده ( من وجهة نظره ) ويقول كان نفسى أنا أكون قاعد عشان أرد الرد الصح مع احترامى لأى حد . نقطه
تعالى بقى لميدو اللى عاوز يرد الرد الصح وبأكرر تانى من وجهة نظره لان الحقيقه من وجهة نظري رد ميدو مضحك جدا
ميدو الذي صال وجال فى ملاعب أوروبا ولم يتعلم شيئا يقدمه لكرة القدم المصريه بيقول لو أنت جامد سيبنى أخد حقى من عقود رعايه عشان أقدر أنافسك
هو سؤال بسيط بس يا ميدو ، هو الاهلى دخله إيه فى القصه دى ؟ أنت محتاج الأهلى يصرف عليك ؟
ياريت كان ينفع يا ميدو ، الفيفا تمنع ذلك الحقيقه ، حاول تجتهد زى ما اجتهدت من سنتين ونزلت صورتك مع أمير مرتضى منصور مع راعى الدورى المصرى وقولت أتفقنا على مشروع سيجعل الزمالك أغنى الانديه .. يا ترى راح فين المشروع يا ميدو ؟
ميدو شايف زى كل الزملكاوية ان المشكله وكالة الأهرام ومش قادرين يقتنعوا ان وكالة الأهرام كانت بتنافس شركات رعايه أخرى وكان الفارق بيكون مليون جنيه فقط تقريبا بين وكالة الأهرام والشركه التى تليها زى ما حازت وكالة الأهرام على رعاية الأهلى ثلاث سنوات ب 140 مليون وصرح وقتها الناقد الرياضى الزملكاوي المحترم محمد سيف ان فى شركه وصلت 139 مليون ، ليه الزمالك مقدرش يتعاقد معاها ؟
لان الزمالك وقتها قرر يسوق نفسه فكانت المنافسه بين مطعم الكوثر والهلال والنجمه الذهبيه وقطونيل وشركة يورك
الاسماء دى حقيقيه وليها كامل الاحترام والتقدير طبعا بس ده كان اجتهاد الزمالك
انتهت رعاية وكالة الأهرام وجاءت من بعدها شركة صله والاهلى هو الأهلى والزمالك هو الزمالك فى قدرة كل منهم على جذب الرعاه ومش قادر استوعب مثلا ليه الزمالك مكنش بينجح لما ڤودافون تفوز برعاية الأهلى انه يتعاقد مع اتصالات او أورانچ مثلا ؟
ليه لما تغير طريقة الرعايه وأصبحت التعاقدات من خلال طرف وسيط فقط لم ينجح الزمالك ؟ هل ده بسبب الاهلى يا ميدو ؟
الغريب ان ميدو بنفسه عارف ان القصه مش فلوس ، بدليل انه أعلن ان المحاميه الخاصه به ستترافع أمام المحاكم مع مرتضى منصور فى قضية اتهام ممدوح عباس بإهدار مليار جنيه
ممدوح عباس نفسه اللى أعترف إنه هو اللى رفع سوق الانتقالات فى مصر ، عمل إيه الزمالك بالمليار جنيه ؟ صفر
صفر يا ميدو ، صفر لانك مقدرتش تصرف الفلوس صح وتحولها لبطولات ، صفر يا ميدو لان انت كنت جزء شاهد على فشل الزمالك حتى عند ضم النجوم بخناقاتك الشهيره مع عمرو ذكى
صفر يا ميدو لانك كنت شاهد على خناقه الحضرى وعبد الواحد وإدخال الجماهير فى الخناقه زى خناقتك مع عمرو ذكى وخناقات كتير من أيام سمير قطب والشلليه فى الزمالك أسلوب حياه
ميدو برر إن الزمالك بيتغير كل 3 سنين مجلس إداره بسبب حل المجلس وتعيين مجلس معين وكأن الأهلى هو اللى بيحل مجالس الزمالك مش أبناء الزمالك زى ما ميدو نفسه إعترف قبل كده
زى ما جورج سعد وميدو يعلم جيدا قيمته لما صرح بوضوح ان استقرار مجلس مرتضى منصور هو السبب فيه لانه رفض يرفع قضايا بحل المجلس
ميدو بيتهم الأهلى بحل مجالس ادارات الزمالك وبيتناسى خناقه بالسلاح الأبيض بين رئيس النادى والنائب داخل مجلس الاداره ، وقضايا استيلاء على المال العام على شاشات التليفزيون واستقالات جماعيه من الاعضاء من أجل حل المجلس
ميدو بيتهم الأهلى بحل مجلس منتخب للزمالك والإتيان بمجلس معين ويتناسى ان المجالس المعينه دى بتنجح أكتر من المجالس المنتخبه فيتم بعد ذلك انتخاب المجالس التى كانت معينه وده يوضح ان من يختار مجلس لنادى الزمالك بالتعيين أفضل من اختيار الجمعيه العموميه من تلقاء نفسها ، والنقطه دى لوحدها كارثه
يعنى أنت نادى لما يكون معاك مليار مبتعرفش تحوله لبطولات ، ولما تكون صاحب قرار اختيار مجلس إدارتك بتختار غلط ، فأنت عاوزنى اختار لك مجلس و أديك فلوس كتير ، طيب بصوت عادل إمام هو أنت متعرفش تعمل حاجه لوحدك ؟
ليه ياعم مانا ك ميدو باقولك الزمالك يغزل برجل حمار ، وان مشكلة الزمالك ال 25 أو ال 30 سنه الاخيره
طيب أنا هأريحك تيجى تشوف تاريخك قبلهم ؟
انت تعرف ان الزمالك فى 52 سنه من 1948 إلى 2000 حصل على 7 بطولات دورى عام و فى آخر 25 سنه بس حصل على نفس عدد البطولات من الدورى العام ؟
يعنى تخيل لما سيبتك لنفسك نص قرن خدت 7 بطولات ولما منعتك تاخد حقك ربع قرن خدت نفس ال 7 بطولات دورى ؟ عرفت ان مصلحتك امنعك ؟ 😂
طيب تيجى تشوف كاس مصر ؟
تعرف انك فيما يقارب 80 سنه حتى عام 2000 واخد 19 بطولة كاس مصر وفى آخر 25 سنه بس واخد 9 بطولات ؟
يعنى انت فى 25 سنه خدت نص بطولاتك فى 80 سنه كأس مصر
تعرف ان الأهلى آخر 25 سنه واخد 7 بطولات بس كأس مصر
بلاش سيد يا ميدو ، اسمع منى
أنت بنفسك كنت بتحذر أمير مرتضى ميلعبش مع سيد
